مفيش مانع…..
” مفيش مانع…..
الشاعر/خالد فضل
مفيش مانع .. مانخدمها
وفى الأهوال .. نقدمها
ولما تخش جوه البيت
نقف ليها .. نجاملها
ويوم تنجح ويوم تفلح نغنيلها
ولما هدومها تتوسخ
مفيش مانع .. مانغسلها
ولو عايزه كمان نحمل
مانحمل حتى أو نحزق
ما نعملها
تروح الشغل وتهيص
ولينا الحرت او نعزق
وأى حاجات نكملها
كلامها أوامر الشابه
تقول هوبا نقول هوبا
تقول كوبا نقول كوبا
حاجات من آسيا وأروبا
ماهيه المايله تعدلها
مفيش رجاله لاموآخذه
ولا الستات كمان عايزه
ولا عاقل بيوزنها
كفوف العدل مقلوبه
ومشايخنا من التوهه
ماتعرف طوبه من توبه
وبتزود ما لا ليها
وشيخنا معمر الطاسه
بفرخه وكبده وأناصه
ويفتى الفتوى أد الحيل
وتيجى ف قلبنا رصاصه
وهو فاكرها مصاصه
يمصمصها ويرميها
وتلزق فينا م الآخر بلاوييها
ياعم الشيخ ياسيدنا الشيخ
آرائك شىء ودينك شىء
ماتخلطش الأمور خلطه
دا شرع يابويا مش سلطه
وكله ماسكلك الغلطه
بيعدلها ويتنيها
ينعكشها ويكويها
ويفرش كل بلاوييها
وقاعد انت تديها
دا اصله حلال
دا اصله حرام
تعبنا خلاص كلامكو رصاص
ل فتوى لست نفتيها
