أصول وعادات ..
بقلم رضا السيد أبوجلاب
من ساعة ما الكاكاو بقي هوت شوكلت …
و البليله بقت بينز …
و الفيشار بقي پوپ كورن …
و الملوخية بقت جرين سووپ …
والفلافل جرين بررجر….
كله كوم و ‘جرين سووپ’ دى كوم لوحدها طبعا …
و القهاوي بقت كافيه … و القهوه نفسها بقت كوفي …
ايشي تركش و اميريكن و كمان الحليب بقي ميلك …
و من ساعة ما الكلسون بقي ليجن …
و البقسماط بقي باتون ساليه …
و الفطير بقي اسمه كريب …
من ساعة ما العري بقي أوبن مايندد …
و الهدوم المقطعه بقت ستايل …
و المخدرات بقت روشنه و صياعه …
و كمان بقي عندنا سنجل مزر وسنجل فازر برضو علشان محدش يزعل و يبقى فيه مساواة …
من ساعة ما الراجل بقي مُز … و البنت بقت رجوله …
من ساعة ما الوطنيه بقت في خبر كان …
والتدين السليم بقي تخلف …
و العادات الشرقيه بقت بيئه …
و ‘السلام عليكم’ بقت بلدي …
من ساعة ما الخلافات بقت اون لاين …
و الزعل بقي بلوك …
و الضحك بقي ايموشن …
و كمان بقينا نكتب عربي بحروف انجليزي من باب الروشنه … والجهل .
ومن ساعة ما البني آدم بقى قيمته ف لبسه و نوع موبيله مش ف أخلاقه و احترامه …
من ساعه ما بقينا نحس بالوحده في وسط اهالينا …
من ساعه ما القرايب بقوا عقارب …
والصحاب بقوا عرر …
هو احنا اتغيرنا اووووي كده ليه ؟ والناس مبقتش زى زمان ؟ و قال بنسأل نفسنا الدنيا ليه مبقتش زي زمان ؟
الناس اتغيرت … و نسينا كل عاداتنا و أصالتنا و جذورنا … قطعنا أرحامنا وفقدنا إحساسنا بالمحتاج (مش شرط محتاج فلوس .. حتي اللي محتاج عطف و حنان ومجرد احساس صادق .. مجرد احساس بالوجود )
و أصبحنا بلا هويه … بلا أخلاق .. بلا إنتماء .
عودوا الي جذوركم يرحمكم الله ….
أبوجلاب
