بالعامية المصرية وحتي لا ينسي التاريخ ذكري استشهاد البطل عماد محمد لطفى عبد المنعم الركايبى
جريدة الأضواء
بقلم /كامل شحاته
ظابط برتبة رائد زيه زى كل المصريين الوطنيين بيحبوا بلدهم ومافيش فرق عندهم بين مسلم ومسيحى
و في يوم عيد أحد السعف سنة 2017
كان واقف حراسة لتأمين الصلاة فى كاتدرائية مارمرقس فى الأسكندرية وكان البابا تواضروس بيصلى القداس داخل الكنيسة
الظابط ده لاحظ واحد عاوز يدخل الكنيسة بسرعة بدون تفتيش وعليه علامات الإرتباك فمنعه ولما حاول الإرهابى يدخل بالعافية الظابط ده طارده وقبض عليه وإحتضنه عشان كان لابس حزام ناسف هيفجره وحاول يهرب لجوة الكنيسة فالظابط فضل أنه ياخد الموجة الإنفجارية بجسمه دفاعاً عن الكنيسة والبابا وكل المسيحيين اللى كانوا بيصلوا جوة الكاتدرائية
بس هو مافكرش كدة
هو فكر أنه هيستشهد دفاعاً عن مصريين
مصريين وبس
إستشهد ومافكرش فى حاجة غير أداء واجبه الوطنى
مافكرش فى زوجته وأولاده
فكر فى واجبه الوطنى بس
الذكرى السنوية السادسة لإستشهاد
الشهيد البطل الرائد عماد محمد لطفى عبد المنعم الركايبى
حقه علينا كلنا كمصريين أننا ننشر قصته عشان تملأ الدنيا كلها ونقول له شكراً يا بطل
رحم الله كل من ضحي بالروح والدم والأهل من أجل أن يبقي هذا الوطن وأهله آمنين مطمئنين
